ANG BUGNO SA MGA TIGULANG
 
Buhat kini nga sagol pabuhi sa dugo,
May magsaguyod ug magkangokango,
May binabaay, may ipaagi’g  kinusiay,
Mga  gininhawa mag-abot,  dili tunhay
 
Sa pahinayay,  mga  lantay  mahugno,
Kon mga tigulang   magbugno,
Kuno kusog pa   moyangoyango
Apay diay  kutob na lang sa dukoduko,
 
Kon mapasagdan, mangataltag hasta dugho,
Buhok mangaupaw,  tanang kusog ibubo
Bisan sa katigulangon, kining tanan mahitabo,
Pagbati nila mag-umido, sila magtungkawo
 
Bisan pa sa dagtom ug awop nga  kahaponon,
Sila gakson ug agakayon, sa kunotong pahiyom,
Ang kangitngit nga nagsabak sa palibot, dagkotan,
Pabilo sa kagabhion alalayan ug pangandaman.

 
 
 
MAINITONG PASIDUNGOG UG PAHALIPAY
 
Mainitong pasidungog ug pahalipay kanimo GOV. JUN DAVIDE.  Dili sayon ug  dili tawhanon ang imong naagian nga tahas sa milabay'ng bugnong lugaynon. Ang imong kalig-on, kaaghop, kaisog ug kadali motuhop sa kalisod sa katawhan ug sa mga panginahanglan, nakapahimo kanimo'ng usa ka hingpit nga pangulo, lider ug tigdala sa tingog sa katawhan.  
 

 
 
PAHALIPAY NGADTO SA BANTUGAN UG KUGIHAN, BOKAL JULIAN “TEBAN” DAAN.
 
Sa makausa pa, sa laing yugto ning kulbahinam nga anib sa talagsaong kasaysayan sa kinabuhi, sa dako’ng kainit ug kalipay, among gipaabot kanimo ang bug-os nga pasalamat sa pagkamalampuson nimong pagdawat sa sulo sa kadaugan Pagka   Bokal  JULIAN “TEBAN” DAAN. 
 
Ang imong katarong, kadali maduol ug kasayon pangitaon, ug pagkadili agdahonon sa gimbuhaton nga mohatag ug kasayon sa mga lungsoranon, nakapahimo kanimong bantugan, dili lamang sa kahanginan, apan sa kasingkasing ug pagsalig usab sa katawhan.
 
Padayona ang pagkamaalagaron, padayona ang nahuptan mong kamadasigon. Kapahimuslan kini sa tanang katawhan nga malaumon. MABUHI KA!!!.

Paghuman Sa Piniliay, Asa Man Ta Paingon?
By Genamos_US of Washington DC, USA

Karon kay nahuman naman ang piniliay
Daghan ang nahuwasan sa ilang kabudlay
Mga kandidato nga midaog nagkiaykiay
Uban ang ilang dumadapig puno sa kalipay

Daghan usab mga kandidato nangaminghoy
Ang kaparutan sa ilang mga gidamgo napusoy
Pun-an pa sa nagastos sa piniliay nagpanaghoy
Kun kanus-a mabawi nila kadtong pundo gilamoy

Kon napildi man sila sa paglansar sa eleksyon karon
Magpailob usa kay dili pa ang ilang tukmang panahon
Kon may programang nasugdan ila kining ipadayon
Aron ang pagsalig sa mga katawhan ilang pahinogon

Hapsay kuno karon ang piniliayng milabay
Kay gamay ra kuno ang porsento ang gipatay
Dili kuno pareho sa mga miaging eleksyon
Mga kagubot ug kaguliyang ang naangkon

 
 
 
ADLAW SA MGA INAHAN
 
Kini ang halad nga adlaw sa binuhat nga nagtukaw,
walay kukahadlok nga miatubang, sa mga pagsuway,
sa kalisdanan sa pagpakatawo,
 
Adlaw ug gabii, iyang gipakigbatukan ang hagit sa kalibotan, ang pagmatuto,  pag-amuma,  ug pagtudlo sa maayong pamatasan ug pagtulon-an.
 
Pagkamabulokon, pagkataas na sa panahon nga atong latason, apan nagkahiusa ubos ning landong sa atong pagpaila sa atong utang kabubut-on.
 
Mabuhi siya, ang nag-inusarang binuhat nga gigikanan, ang naghupot ug  tago-angkan, ANG INAHAN.
 

 
MODERNO’NG TEKNOLOHIYA, DILI IGO’NG MAKAHUBAD SA PINULONGAN’G BINISAYA
 
Ang dila ug pinulongan’g binisaya, dili mahulipan sa binag-ong teknolohiya ug paghubad, dili usab masayonsayon kon ang paglitok sa ingon wala magikan sa kasingkasing ug panghunahuna nga lunsay'ng nakasabot.  
 
Kini gilalik sa kinaiyanhon'g pagmatuto nga gihatag  sa kahitas-an, nahimo'ng timailhan sa mapasigarbohon'g kaliwatan ug katawhan.

 
 
KADAUGAN UG KAPAROTAN
 
padulngan ug sangpotanan,
ang kadaugan ug kaparotan,
 
kadaugan
 
kadaugan sukwahi sa kaparotan,
paningkamot maoy iyang  gigikanan,
buhaton, kuptan, kabyonan ang tanan
kahago,  singot, kusog,  hasta  puhunan,
ibubo  aron kab-oton lang ang    kadaugan,
ikalipay, kini ang giilogan sa kadaghanan, 
daghan ang mangamahan ug  kadaugan,
 
kaparotan
 
ang kaparotan yam-iran, sumsoman
maghinuktok, mingaw ug minghoy,
may magsabasaba  mura'g basa'ng itoy,
may manglipaghong nga maparot,
dili magpapilde,  magsige ug bagotbot,
yawyaw niya dili mahurot, daw mamaghot
kadaugan sa nakadaug iyang ipanghimaraot, 
 

 
 
POLITIKO
 
Sa kadaghanan sila nahimong inila,
Kusog magpailaila ug mangumusta,
Ngisihan bisan kinsa, bisan dili kaila,
 
Ang piniliay maoy iyang puntarya,
Kuhaon ang boto de kumpiyansa
Sa kadaghanan, puntil sa kuwarta
 
Pinalitay maoy iyang hiramenta
Human sa  bugnong lugaynon,
Human sa gasto’ng makalipong,
 
Siya maghinuktok ug maghunahuna,
Gahom ug kahalangdon iyang nakuha,
Sa hilom ug samtang magpitokpitok,
 
Panudlanan sa katawhan siya magtutok
Takna sa pinalitay, milabay na,
Pagbawi sa gasto’ng hinutdanay MIABOT NA!!!

mayo trese, dos mil trese.

adlaw sa piniliay ug tinaktakay

sa balota, ang lapis ipabagnod

sa gamay karton ang balota ipasalipod.

pilia higala ang sakto ug kwalipikado

ang matood ug angayan nga kandidato

i-asa man lagi ang kasikat ug katisoy

kung dili kamao nya magsige na lang nya ug panaghoy.

pilion ta ang maayo nga lider

lider nga maoy manguna 

ug dili ang magpunay lang

ug mandar, murag commander

sa piniliay karon nga moderno

dili lang unta ang pikos ang mauso

kung dili - ang pagpauso ug pagbag-o

sa kinaraan tang stilo.

Gamayng salapi ayaw'g kahiwi

nungka ampingi ang imong boto isip usa ka bahandi.

Sukad sa akong pagmata, ako nakapangutana ug daghang mga pangutana nga ang uban sayon tubagon sa akong kaugalingon, apan ang uban lisod para huna-hunaon man lang. Sa bata pa ko, wala gayod ako nahibalo kung asa naggikan ang tao, giunsa paghimo ang kalibotan, kinsa ang naghimo niining tanang mga butang nga makita ug dili makita dinhi sa kalibotan nga atong gipuy-an. Ang ako lang nadumdoman samtang nag-eskwela ko sa Elementarya, adunay mga alamat kung giunsa paghimo ang kalibotan, ug nabasa pud nako nga gitudlo sa libro nga siyensya kung asa kita gikan. Sa akong pagsimba kaniadto ako nagsugod ug tuo nga adunay Ginoo nga nagbuhat kanatong tanan ug niining kalibotana, apan dili klaro kanako ang pagsabot nganung anaa man kita manluluwas, ug nganong kinahanglan mang maluwas ang mga tao sa mga sala?