KAG-AT
 
pagdibuho sa pamayhon,
nawong niya piyahokon,
iyang linaktan luyahon,
 
iyang  agtang  kunoton,
himsog  siya sa kanhiay,
dunggan nangnipis sa lahutay…
 
ang kakulang sa tulog,
hago ug  tiyan walay sulod,
mahilig magsige'g kayod,
 
 adlaw, gabii, kaadlawon  mangukay,
 manguhit magpaambit ug kalipay,

 
 
PUNTO
 
unod sa hisgotanan,
bunga sa gihisgotan,
magdala'g gagmay'ng kalibog,
pahungaw sa  lalis ug pangisog,
 
human sa kuti'ng pagkulitog,
mohatag ug kasayon sa pagsabot,
hangpon,  sa tanan ikahimuot,
lamdagan ang magbagotbot,
 
walay pulong mapasupot,
maminaw samtang magmug-ot,
sa punto ang tanan ipasabot,

 
SINGOT
 
bunga sa paningkamot,
talan-awon'g nagkadusingot,
may bugbog nga singot,
may pudyot ug tagidyot,
kini magdepende sa pasingot,
 
sa binuhat nga imong gikapasingot
ang hangos sabakon  ug singot,
abunda ilabi na'g alimuot,
bisan asa, bisan kanus-a,
 sa singot dili ka mokumpyansa,
 
sa hagit ug pasingot, ikaw makalimot,

KUMPAYOT
 
 buhat nga mugamit ug kamot,
manggunit ug mangupot,
 
maniguro'ng dili mahulog,
sa kapyot siya mangusog,
 
inantigo'ng maningkamot,
 dili igsapayan'g magsige'g kapyot,
 
mataptan ma'g panuhot,
sa kakusog mokapyot,
 
magkadugay magkasapyot,
nawong mangaluyot,
 

DUNGOG
 
kini ang imahen,  hulagway ug talan-awon’g
magdibuho sa tawo’ng  maukiton
sa buhat nga katilingbanon…
 
dili sayon  ang dungog  nga mahimo’ng sumbanan,
dungog nga mahimong panag-ingnan
karon ug sa kahangtoran…
 
adunay dungog sa pagkasalawayon, badlongon,
ang suhi, sukwahi maoy buhaton
siya panghimaraoton…  
 

Ang Bulak
By Genamos_US of Washington DC, USA

Pagkaanindot nga pulong litokon
Ang tingog sa kinaiyahan madanihon
Sama sa usa ka bitoon sa langit
Madalidali ra nato og mapalit

Sa tibook tuig ato siyang makita
Bisan unsang okasyon gipangita
Labi na sa adlaw sa mga kasingkasing
Sa mga nakadawat murag mapraning

Gasa sa kahitas-an sama sa bulawan
Mabulokon ang dagway sa kalibutan
Sund-onga ang kabukiran kon wala
Sama ra kini nawad-an og himaya

Mga alibangbang, buyog ug kalanggaman
Masadyaon nagtan-aw sa mga halaman
Nagkalainlain man ang ilang mga kolor
Nindot iadorno sa ibabaw sa aparador

Mga rosas ug sampaguita pagkahumot
Ang katam-is nangalimyon dili mahurot
Mga kapatagan ug kabukiran gikoloran
Sa mga kabulakan nga nindot ilarawan

Ang Alibangbang
By Genamos_US of Washington DC, USA

Ang inahan nga alibangbang milupad
Sa mabagang tanaman siya gipadpad
Aron ang mga itlog iya kining ilatad
Kay sugo sa kinaiyahan iyang gisaad

Inig kapusa ang mga til-as manimpalad
Nagkalandrakas na kolor ang gihalad
May mga tunokon, niwang ug tambokon
Managkapyot sa mga sanga ug dahon

Apan sa pag-abot sa iyang pagkalinghod
Mga dahon ang pagkaon wa siya maglisod
Ang dahon maoy iyang himoong bayanan
Aron didto mopasilong ug iyang kapuy-an

Sa iyang pagsuroy-suroy siya makatulog
Sa kakapoy siya mahinanok na busog
Ilawom sa layang dahon siya mopasilong
Nakumbitay sa sanga nga sama gilubong

Pipila ka mga adlaw o semana ang molabay
Ang til-as mahimong alibangbang na gamay
Mangimbisog molupad na puno sa kalipay

NAGKALAIN-LAIN ANG KANDIIS
 
kandiis nga dayag makita:
 
“kaguwapaaa, kandiison lagi na siya…”
 
kandiis nga dala sa subra’ng timbang:
 
“Ah, grabbeeeh…..hasta lukon-lukon nangandiis?”
 
kandiis nga tinagoan, dili pahayagan:
 

BUTA
 
ngitngit, mingaw ug haw-ang,
hubo sa talan-awon'g pinasagdan,
tingog ang gamitonon'g gabayan,
hiram ug simhot dali’ng madangpan,
kon hagit sa pag-ila,  pag-ila ila ang hisgotan,
 
ang pulong buta, nahimong sanglitanan
may gugma’ng buta, mag-unggoy’ng buta
may magdala’g kabo,  magpaila’ng  buta
ang pulong buta, pagpaila nga siya buta
mahimong puhunan sa  nagpakabuta,
 
may mapandol ug matakilpo,
adunay mapakong ug masuko,
dagko’ng hitak sa kamapasagaron,
siya nahitumpawak, nagpa-ulipon,
kahibudnganan kay dili siya buta,
 
tanan dayag makita sa iyang mata,
sa pag-amping diay siya nabuta,
pangandoy sa kahayag gikalimtan na niya,
sa iyang pagbutabuta ug pagpakabuta,

 
HUNYO
 
ikaunom nga bulan sa tuig,
han-okanan sa daghang pasalig,
sa kaminyoon magpaalig-alig,
 
ang liso'ng gitanom, malaumon,
binubuan sa gakos nga maamumahon,
kining tanan iladlad, sa kadaghanan ipasiatab,
 
sabakon sa gastong makapasukarap,
bisan pa'g panudlanan nagpangapkap,
bulsa mabalit-ad ug alkansiya mangabuak,
 
ang tanan dili igsapayan, katumanan,
kapahungawan sa damgong tinan-ogan,
kakulbahinam mogitik sa kahiladman,
 
singot, hapyod, hangos nga tinagoan,