Binuang uyamot ang konsepto sa creatio ex nihilo
dili mahimo kun imposible ang creatio ex nihilo nga buot ipasabot "pagmugna gikan sa wala"
1. pinasunod sa gumaranong panabot, "walay wala nga anaa kun ang wala gani dili gayod mahimong anaa"
2. pinasikad sa pisika, misupak kini sa unang balaod sa termodinamika
sumala pa sa usa ka ang teyista nga nagsunod sa klasikang o kukaraang griyegohanong pagsabot sa diyos, mahimo kuno sa diyos ang tanan apan matod usab kanila dili usab makabuhat ang diyos og mga kasukwahian sa lohika/pangatarongan
pananglit, ang 2+2 dili gayod mahimong motumbas sa 5, dili mahimong wad-on sa diyos ang iyang pagkadiyos ingon man nga dili siya makabuhat og bug-at uyamot nga bato nga dili nila mahimong aswaton.
nan tataw gayod nga may kinutoban ang diyos sulod sa lohika. wala gayoy kawalaan sa kahulogan niana daan busa dili gayod kana mahimong usa ka butang nga anaa sanglit sukwahi kana sa lohika.
ug tungod giisip sa teyista nga axiom (kun usa ka masukaranong katinuoran) ang diyos, nga usa ka dumalayong pagkaanaa, nagkahulogan gayod nga gimugna sa diyos ang lukopngatanan gikan sa iya mismong kaugalingon. Mihaom kini sa emanasyonismo (ang pagtuo nga ang lukopngatanan nagatubod mismo gikan sa diyos) ug panteyismo (ang pagtuo nga ang diyos mao ang mismong lukopngatanan) busa atong mapangataposan nga ang lukopngatanan gama mismo sa diwa, uyok kun pagkamao sa diyos.
Malimbongon gayod ang kadaghanan sa mga apolohistang teyista, ipasumangil nila ang lohika aron makalusot sa suliran nga dili mabuhat sa diyos ang tanan samtang moingon dayon sila usab nga ang diyos labaw ug saylo pa sa lohika. Giilin-ilinan ra nila ang lohika kon kanus-a mouyon kun mopabor kanila.
- Arjuna Dalakilat's blog
- Login or register to post comments
Comments
Ikatulong pagpanghimakak
Na hala kalawaton ko na ang imong katin-awan. Wala ka sukad mosulti nga mapanahonon kun tuiganon ang "ex nihilo", gani lig-onon pa ta na nga baroganan. Mitukma ang imong pagkutlo kang Manoy Tomas, apan matikdi gani karon kon asa ka ini idangat. Kon kahan-ayan lamang sa pagkabutang ang gitimaan sa "ex" ug kon dili kana matuiganon kon makabyutan-on angay natong sukoton ang matang kun bagay niana. Pagkauna sa kinaiyahan lamang ang kapilian nga mao ang pagkahan-ay sa hinungdan diha sa iyang sangpotanan kun sa usa ka pauna nganha sa pangataposan niana. Apan, usa kana ka katalian sa duruha ka butang nga nanag-anaa. Kay lagi walay bagad nga hiyas, gahom kun takna ang "wala" nan dili gayod kana mahimong mahilakip sa unsa mang kahan-ayan.
Dili mahimong kahan-ayan ang "pagkahuman sa pagkawala" sanglit malit-ag kana ngadto sa ikaduhang kahulogan nga gipahayag ni Tomas sa maong tudling: "wala ibuhat gikan sa unsa man nga butanga." Usa kini ka kadilian. Wala kini motug-an kon unsa gayod ang kamugnaan, igo lamang niini gisulti ang pagkadili sa kamugnaan. Wala kini laing dayag nga kahulogan, kahibalo, ubp nga gidungag mahitungod sa pagkamao niana.
Busa ang masangpotong paghinungdan na lamang ang nahabilin nga dayag nga butang gikan sa diyos nga walay kabyutanong paghinungdan. Mao kini ang gitumong sa ikatulo kong pangatarongan nga wala pa gihapon mo mapahimakak. Gipulongan lingon ni Manoy Tomas ang kamugnaan isip ang pagtubod sa tanang pagkaingon. (sumala sa Summa Theologica I q.45 a.1). Nan, kon bug-os nga manag-usa lamang gayod ang gahom, pagbuot ug pagkamao sa diyos, ug walay ikatampo ang "wala" nganha sa usa ka minugna, tataw lamang ang pangataposan nga nagtubod lamang gikan sa diyos ang tibuok kinaiya, hiyas ug pagkaanaa sa usa ka lalang. Busa unsa na man ang kalahian niana sa "ex deo"? Magawasnon kuno ang kamugnaan ug wala ikinahanglan mao kini ang naandang pagtubag gikan sa mga taglaban sa agama. Unsa man ang sukaranan niana nga kagawasan kon managmao da man diay ang pagbuot ug pagkamao? Gikutana mo pa kon nahisabtan ko ba kon unsa kana ang "wala." Natuhog ko ang uyok niana (bisan tuod dili kana anaa) maong dili gayod kana mahimong ipahimutang sa unsa mang pagkahan-ay. Usa gayod lamang ka kadilian ang "ex nihilo", dili kana hinungdan kun katinaw-an.
Apan kon ugaling buot mo man ang usa ka tanol nga panaglantugi bukas pa gihapon ako niana.